2026-nji ýylyň aprel aýynyň 6-na Binagärlik-gurluşyk fakultetiniň “Suw üpjünçiligi, ulanylan suwlary akdyryş we suw gorlaryny goramak” hünäriniň 2-nji ýyl talyplary üçin gyzykly we täsirli göçme okuw sapagy geçirildi. Okuw sapagy “Suw, gaz we ýylylyk üpjünçiligi” kafedrasynyň tejribeli uly mugallymy A.Saparow we mugallym K.Komekowyň ýolbaşçylygynda “Ajaýyp gurluşyk” hususy kärhanasy tarapyndan gurluşygy güýçli depginde alnyp barylýan Türkmen döwlet binagärlik-gurluşyk institutynyň täze binalar toplumynyň gurluşyk meýdançasynda geçirildi.
Kärhananyň hünärmenleri talyplara gurluşyk meýdançasynda ýüze çykyp biljek dürli ýagdaýlar, zähmeti goramak we tehniki howpsuzlyk düzgünleri, adatdan daşary ýagdaýlaryň öňüni almak hem-de olara garşy çäre görmek barada jikme-jik düşündiriş işlerini geçirdiler. Soňra talyp ýaşlar kärhananyň hünärmenleri bilen bilelikde dürli ýerlerinde alnyp barylýan gurluşyk işleri bilen tanyşdylar.
“Suw, gaz we ýylylyk üpjünçiligi” kafedrasynyň mugallymlary tarapyndan guralan bu sapak diňe bir gurluşyk prosesleriniň tehniki taraplaryny düşündirmek bilen çäklenmän, eýsem, talyplaryň çözgüt gözleg ukybyny, toparlaýyn işleşmek başarnygyny hem ösdürmäge gönükdirildi. Şeýle göçme okuw sapaklary ýaş gurluşykçylaryň tejribe toplamagyna, hünär taýdan pugtalanyp, geljekki zähmet ýoluna ynam bilen başlamagyna giň mümkinçilik döredýär.
