Binagärlik-gurluşyk fakultetiniň “Senagat we raýat jaý gurluşygy” hünäriniň 3-nji ýyl talyplary üçin gyzykly we täsirli göçme okuw sapagy geçirildi. Okuw sapagy “Senagat we raýat jaý gurluşygy” kafedrasynyň tejribeli uly mugallymy Y.Ataýewiň we mugallym M.Nuryýewiň ýolbaşçylygynda “Ajaýyp gurluşyk” hususy kärhanasy tarapyndan gurluşygy güýçli depginde alnyp barylýan Türkmen döwlet binagärlik-gurluşyk institutynyň täze binalar toplumynyň gurluşyk meýdançasynda geçirildi.
Kärhananyň hünärmenleri talyplara gurluşyk meýdançasynda ýüze çykyp biljek dürli ýagdaýlar, zähmeti goramak we tehniki howpsuzlyk düzgünleri, adatdan daşary ýagdaýlaryň öňüni almak hem-de olara garşy çäre görmek barada jikme-jik düşündiriş işlerini geçirdiler. Soňra talyp ýaşlar kärhananyň hünärmenleri bilen bilelikde dürli ýerlerinde alnyp barylýan gurluşyk işleri bilen tanyşdylar.
Täze binalar toplumynyň içinde, aýratyn üns çekýän ýerlerden biri hem kitaphana boldy. Onuň içi giň we açyk, ýokary penjerelerden düşýän ýumşak, tebigy ýagtylyk bilen doldurylan. Kitaphananyň daşky görnüşi we içki bezegi gurluşyk materiýallarynyň tebigy reňkleri we ýumşak dokumalary bilen sazlaşýar, ylmy işleriň we döredijilik işjeňliginiň arasynda amatlylygy üpjün edýär. Bu ýerde talyplar diňe bilim alyp bolman, eýsem pikirlerini ýygnaýarlar, döredijilik ukybyny ösdürýärler we täze ideýalara açyk bolýar.
Kitaphana, täze binalar toplumynyň ruhy merkezine öwrülip, ýaş hünärmenler üçin ylmy we estetiki rahatlyk berýän ýer hökmünde aýratyn ähmiýete eýe. “Senagat we raýat jaý gurluşygy” kafedrasynyň mugallymlary tarapyndan guralan bu sapak diňe bir gurluşyk prosesleriniň tehniki taraplaryny düşündirmek bilen çäklenmän, eýsem talyplaryň çözgüt gözleg ukybyny, toparlaýyn işleşmek başarnygyny hem ösdürmäge gönükdirildi.
Şeýle göçme okuw sapaklary ýaş gurluşykçylaryň tejribe toplamagyna, hünär taýdan pugtalanyp, geljekki zähmet ýoluna ynam bilen başlamagyna giň mümkinçilik döredýär.
